2 августи соли 2025 дар доираи сафари корӣ вазири маориф ва илм ва намояндаи Ҳукумати Ҷумҳурии Тоҷикистон дар ноҳияи Кӯшониён Раҳим Саидзода дар ҳамроҳӣ бо раиси ноҳия Маҳмадшариф Холзода ба Муассисаи таҳсилоти миёнаи умумии №42 ба номи Завқиев Юсуфалӣ, воқеъ дар Ҷамоати деҳоти Ориён ташриф оварда, бо омӯзгорону кормандони соҳаи маориф вохурӣ ва суҳбати самимӣ анҷом доданд.
Зимни вохурӣ вазири маориф ва илм аз дастгириҳои рӯзафзуни Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон нисбат ба соҳаи маориф ёдовар шуда, таъкид намуд, ки сиёсати хирадмандонаи Сарвари давлат ба рушди бемайлони соҳа мусоидат намуда, дар баробари ҳалли мушкилоти ҷойдошта, инфрасохтори соҳа низ дар сатҳи зарурӣ рушд меёбад.
Дар идомаи суҳбат вазир омӯзгоронро ба фаъолияти содиқона, масъулиятшиносӣ ва татбиқи босамари барномаҳои давлатӣ дар соҳаи маориф даъват намуда, қайд кард, ки нақши омӯзгор дар тарбияи насли наврас ва таҳкими пояҳои маънавии ҷомеа сарнавиштсоз аст.
Дар интиҳои вохурӣ чанд нафар омӯзгорони фаъол ва намунавӣ барои натиҷаҳои назарраси меҳнатӣ бо туҳфаҳои пулӣ қадрдонӣ гардиданд.
Баъд аз анҷоми вохурӣ вазири маориф ва илм аз раванди сохтмони 7 синфхонаи иловагӣ дар назди муассисаи мазкур боздид намуда, бо сохтмончиён суҳбат намуд. Зимни суҳбат вазир изҳор дошт, ки таваҷҷуҳ ба соҳаи маориф бояд кори дастаҷамъӣ бошад ва барои ноил шудан ба ҳадафҳои созанда бояд тамоми сохторҳои марбута ва ҷомеа саҳми худро гузоранд. Ташаккур ба ҳамаи онҳое, ки бо дастгирии пайваста сиёсати маорифпарваронаи Пешвои миллатро амалӣ намуда, барои беҳтар гардидани шароити таълим ва тарбияи насли нав кӯшиш ба харҷ медиҳанд.
Маркази матбуоти
Вазорати маориф ва илми
Ҷумҳурии Тоҷикистон
